ନୂଆଦିଲ୍ଲୀ ଜାତୀୟ ସଙ୍ଗୀତ “ବନ୍ଦେ ମାତରମ୍” ଉପରେ ସଂସଦରେ ଚାଲିଥିବା ରାଜନୈତିକ ବିତର୍କ ମଧ୍ୟରେ, କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପ୍ରତିଆକ୍ରମଣ କରିଛନ୍ତି। ସେ କହିଛନ୍ତି ଯେ “ବନ୍ଦେ ମାତରମ୍” ହେଉଛି ଦେଶର ଆତ୍ମା ଏବଂ ସରକାର ଏହାକୁ ବିବାଦୀୟ କରି ଏହାର ମୂଳ ଆତ୍ମା ଉପରେ ଆକ୍ରମଣ କରୁଛନ୍ତି। ପ୍ରିୟଙ୍କା ଅଭିଯୋଗ କରିଛନ୍ତି ଯେ ବିଜେପି ସରକାର ଏହି ପ୍ରସଙ୍ଗ ଉଠାଇ ସାଧାରଣ ଜନତାଙ୍କ ଧ୍ୟାନ ପରୀକ୍ଷା ପେପର୍ ଲିକ୍, ବେକାରୀ, ମୁଦ୍ରାସ୍ଫୀତି, ସଂରକ୍ଷଣ, ମହିଳାଙ୍କ ସ୍ଥିତି ଏବଂ ଯୁବପିଢ଼ିଙ୍କ ସମସ୍ୟା ଭଳି ଜ୍ୱଳନ୍ତ ପ୍ରସଙ୍ଗରୁ ହଟାଇବାକୁ ଚାହୁଁଛନ୍ତି। ତାଙ୍କ ମତରେ, ଦେଶ ଅତୀତ ବିଷୟରେ ବିତର୍କ କରିବା ପରିବର୍ତ୍ତେ ବର୍ତ୍ତମାନ ଏବଂ ଭବିଷ୍ୟତର ସମସ୍ୟା ଉପରେ ଉତ୍ତର ଚାହୁଁଛି।
ପ୍ରିୟଙ୍କା ଦର୍ଶାଇଛନ୍ତି ଯେ ୧୯୩୭ ମସିହାରେ, କଂଗ୍ରେସ କାର୍ଯ୍ୟକାରିଣୀ କମିଟି – ଯେଉଁଥିରେ ଗାନ୍ଧୀ, ନେହେରୁ, ସୁଭାଷ ବୋଷ, ଟାଗୋର ଏବଂ ପଟେଲଙ୍କ ଭଳି ସମସ୍ତ ପ୍ରମୁଖ ନେତା ସାମିଲ ଥିଲେ – ସର୍ବ ସମ୍ମତି କ୍ରମେ ବନ୍ଦେ ମାତରମକୁ ଜାତୀୟ ସଙ୍ଗୀତ ଭାବରେ ଗ୍ରହଣ କରିଥିଲେ। ସ୍ୱାଧୀନତା ପରେ, ସମ୍ବିଧାନ ସଭା ମଧ୍ୟ ଏହାକୁ ଆନୁଷ୍ଠାନିକ ଭାବରେ ଜାତୀୟ ସଙ୍ଗୀତ ଭାବରେ ଘୋଷଣା କରିଥିଲା ଏବଂ ସେହି ସମୟରେ କୌଣସି ସଦସ୍ୟ ଆପତ୍ତି ଉଠାଇ ନଥିଲେ।ସେ କହିଥିଲେ ଯେ ଆଜି ଜାତୀୟ ସଙ୍ଗୀତର ସ୍ୱରୂପ ଉପରେ ପ୍ରଶ୍ନ ଉଠାଇବା ସେହି ମହାପୁରୁଷଙ୍କ ପ୍ରତି ଅପମାନ, ଯେଉଁମାନେ ନିଜ ବୁଦ୍ଧିମତା ଆଧାରରେ ନିଷ୍ପତ୍ତି ନେଇଥିଲେ। ଶେଷରେ, ପ୍ରିୟଙ୍କା କଟାକ୍ଷ କରି କହିଥିଲେ ଯେ କଂଗ୍ରେସ ୧୯୦୫ ପରଠାରୁ ପ୍ରତ୍ୟେକ ଅଧିବେଶନରେ ବନ୍ଦେ ମାତରମ ଗାଇ ଆସିଛି, କିନ୍ତୁ ବିଜେପି କାର୍ଯ୍ୟକ୍ରମରେ ଏହି ପରମ୍ପରା କାହିଁକି ଦେଖାଯାଉ ନାହିଁ?
