ଯୁବ ସମାଜସେବୀଙ୍କ ନିଆରା ପ୍ରୟାସ। ରକ୍ତଦାନ ଶିବିର ଓ ମୋତିଆବିନ୍ଦୁ ଚକ୍ଷୁ ଚିକିତ୍ସା ଶିବିର ଆୟୋଜନ କରି ପାଳିଲେ ଜନ୍ମଦିନ। ଏଭଳି ନିଆରା ଦୃଶ୍ୟ ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା ଏରସମା ବ୍ଲକ କୃଷ୍ଣଚନ୍ଦ୍ରପୁର ପଞ୍ଚାୟତ ଭିରଙ୍ଗ ଗ୍ରାମରେ। ଭିରଙ୍ଗ ଗ୍ରାମର ଯୁବ ସମାଜସେବୀ ମାନସ କୁମାର ସ୍ୱାଇଁ ନିଜ ଜନ୍ମଦିନରେ ଭିରଙ୍ଗ ହାଇସ୍କୁଲ ପରିସରରେ ଏକ ରକ୍ତଦାନ ଶିବିର ଓ ମୋତିଆବିନ୍ଦୁ ଚକ୍ଷୁ ଚିକିତ୍ସା ଶିବିରର ଆୟୋଜନ କରିଥିଲେ। ଭିରଙ୍ଗ ବାଟମଙ୍ଗଳା ଯୁବକ ସଂଘ,ଆମ ଓଡିଶା,ଭୂମିକା ଚକ୍ଷୁ ଚିକିତ୍ସାଳୟ ସହଯୋଗରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ ଏଥିରେ ବହୁ ଶିକ୍ଷାବିତ୍ତ,ସିନେ ପ୍ରଯୋଜକ, ଆଇନଜିବୀ, ସମାଜସେବୀ,ସାହିତ୍ୟିକ,ସେଛାସେବୀ ଓ ବିଶିଷ୍ଟ ବ୍ୟକ୍ତିମାନେ ଯୋଗଦେଇଥିଲେ। ଅବସରପ୍ରାପ୍ତ ପ୍ରଧାନଶିକ୍ଷକ ଅଭୟ କୁମାର ପ୍ରଧାନଙ୍କ ସଭାପତିତ୍ୱରେ ଆୟୋଜିତ ସଭାରେ ରକ୍ତଦାତା ଓ ବିଶିଷ୍ଟ ବ୍ୟକ୍ତି ମାନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହି ନିଆରା ଆୟୋଜନକୁ ଆମନ୍ତ୍ରିତ ଅତିଥିମାନେ ପ୍ରଶଂସା କରିଥିବା ବେଳେ ଜନ୍ମଦିନରେ ନିଜେ ମଉଜ ମସ୍ତି ନକରି ସମାଜସେବା କଲେ ଆନନ୍ଦ ମିଳେ ବୋଲି ଯୁବ ସମାଜସେବୀ କହିଥିଲେ।
